News details

റമദാന്‍ ആത്മസംസ്കരണത്തിന്

June 01, 2016

പുണ്യങ്ങളുടെ വസന്തമായ റമദാന്‍ ആത്മസംസ്കരണത്തിന് പരമാവധി വിനിയോഗിക്കണമെന്ന് പ്രഗത്ഭ പണ്ഡിതനും കെ.എന്‍.എം. സംസ്ഥാന ജനറല്‍ സെക്രട്ടറിയുമായ എം. സ്വലാഹുദ്ദീന്‍ മദനി പ്രസ്താവിച്ചു. ശൈഖ് അബ്ദുള്ള ബിന്‍ സൈയ്ദ് ആലുമഹ്മൂദ് ഇസ്ലാമിക് കള്‍ചറല്‍ സെന്‍റര്‍ (ഫനാര്‍) സംഘടിപ്പിച്ച അഹ്ലന്‍ റമദാന്‍' പരിപാടിയില്‍ മുഖ്യ പ്രഭാഷണം നടത്തുകയായിരുന്നു അദ്ദേഹം. ഉത്തമ വിശ്വാസികള്‍ പോലും ഉപഭോഗ സംസ്കാരത്തിന്‍റെ അടിമകളായി മാറുന്ന സമകാലിക ലോകത്ത് റമദാന്‍ മാസം പോലും കമ്പോളവത്കരിക്കപ്പെട്ടുകൊണ്ടിരിക്കുന്നത് അത്യന്തം സങ്കടകരമാണ്. ഭക്ഷണ പാനീയങ്ങള്‍ വര്‍ജ്ജിക്കുക എന്നത് വ്രതത്തിന്‍റെ ഒരു ഘടകം മാത്രമാണ്. യഥാര്‍ത്ഥത്തില്‍, അനുവദനീയമായതും ഏവര്‍ക്കും ഇഷ്ടപ്പെട്ടതുമായ വിഭവങ്ങളും സൗകര്യങ്ങളും നിശ്ചിത സമയത്തേക്കും കാലത്തേക്കും മാറ്റിവെക്കുകയും നിയന്ത്രിക്കുകയും ചെയ്യുന്നതിലൂടെ മനസിന്‍റെ വിമലീകരണമാണ് ദൈവം നമ്മോടാവശ്യപ്പെടുന്നത്. വ്രതത്തിന്‍റെ ഈ ഒരു ആത്മീയവശം മറന്നുകൊണ്ട് റമദാനിനെ ഭക്ഷണവിഭവങ്ങളുടെ വൈവിധ്യങ്ങള്‍ പരീക്ഷിക്കുന്നതിനുള്ള അവസരമായി മാറ്റുന്നതില്‍ നിന്ന് യഥാര്‍ത്ഥ വിശ്വാസികള്‍ മാറിനിന്നേ മതിയാവൂ, മദനി ചൂണ്ടിക്കാട്ടി.


നോമ്പ് നഷ്ടപ്പെട്ടുപോകുന്ന സാങ്കേതിക കാരണങ്ങളെപ്പറ്റി സംശയാലുക്കളാകുന്ന പലരും സംസാരത്തിലും പ്രവൃത്തികളിലും ചിന്തയിലുമുണ്ടാകുന്ന വൈകല്യങ്ങള്‍ മൂലം നോമ്പ് കേവലം പട്ടിണിയായി മാറുന്ന മഹാ നഷ്ടത്തെക്കുറിച്ച് ബോധവാന്‍മാരാവുന്നില്ല എന്നത് ഗൗരവത്തോടെ കാണേണ്ടതാണെന്നും അദ്ദേഹം ഉണര്‍ത്തി.
ഫനാര്‍' ഓഡിറ്റോറിയത്തില്‍ നടന്ന പരിപാടിയില്‍ ഖത്തര്‍ ഇന്ത്യന്‍ ഇസ്ലാഹീ സെന്‍റര്‍ വൈസ് പ്രസിഡണ്ട് ടി. അബൂബക്കര്‍ ഫാറൂഖി അദ്ധ്യക്ഷനായിരുന്നു. ജനറല്‍ സെക്രട്ടറി സിറാജ് ഇരിട്ടി, സെക്രട്ടറി നജീബ്. എം.കെ. എന്നിവര്‍ സംസാരിച്ചു.